422 嘩！畫面好清景深好淺呀！
我頭腦比較古老石山，自從有得拍 video o既 D-SLR 出現之後，一直都唔係太認同以 D-SLR 當正 DV 咁用。
不過我發現，o係今日香港婚禮攝影場合，呢種趨勢似乎愈來愈普遍。對上果次去觀禮，影 video o既主力攝影師只有一部 Canon 5D II 同埋支單腳，重有一支插o係 Hotshoe o既 Azden 收音咪。我o係附近觀察o左一段時間，見攝影師佢一個一個 shot 幾秒幾秒咁拍，主體一有大幅度移動，攝影師就會停機，咁唔使問阿貴你就可以估到，最後出o黎果條片，會係以o羊形式出現。我唔知道呢種拍攝手法，可以點樣呈現一個比較完整o既婚禮過程，就算攝影師o既技巧出類拔萃過李屏賓，收音o既功夫叻過杜篤之，都係咁話，段估都唔能夠由無變到有o掛。呢次事件，又啟發o左我一個新意念，即係如果用「倒敘法」去剪一條婚禮片，都幾破格。
當然，任何一個攝影師用 DV 機，都一樣有權或者有可能選擇咁樣拍，之但係我會覺得今次，呢位年輕o既攝影師，明顯係受制於重未成熟o既「拍攝器材」。婚禮紀錄，並唔係條片畫面好清景深好淺就叫做好（無國界獨立製作四級短片另計），好多時，可能只不過係捕捉到過程之中既某句說話又或某一個情景，已經叫人動容回味，因為婚禮裡面o既突發場面，你幾有經驗都好，有時都估佢唔到。
如果用 D-SLR 拍o下硬照又拍o下 video，果種感覺就會有D似食緊一口飯又同時食番一啖粥，呢種情況確係好似 D-SLR 最初有 LiveView 果時，我見D人買部 D-SLR 番o黎全程用 LiveView 影相，為o左 LiveView 而 LiveView 一樣道理。
當然，人有權自由選擇，你可以好似周星馳扮交通警員咁，騎住架鐵馬之後唔比油之但係雙腳又踏住地下係咁一步步向前行。我好想知道，其實咁樣，係o米叫迷失呢？
死喇，呢篇肯定又得罪好多人喇！不過我記得黎智英講過：「你不準備犧牲，就不會快樂。」係o米好奇點解我今次用火星文寫呢篇野呢？o米為o左想寫火星文而火星文o羅！親切D嘛！
題外話：
有時間又有心機o既話，我會用 呢首歌 剪條婚禮短片，我諗會好正！
圖片：《自拍》攝於香港。石硤尾
2 comments:
喜歡這張相的顏色。
景深淺係咪即係成個畫面都好清晰？
景深深係咪即係個主體好突出？
雖然我喜歡影相，但其實我成日搞唔清d術語的，哈哈﹗
又，我部機都有得拍短片，但覺得其實無乜用，我諗不多不才係因為我對你呢篇都有同感。
TO: C
謝謝！
簡單一點說：景深是焦點前後延伸的清晰區域，一般大多是說焦點後的清晰區域，即愈深，能見的清晰度愈遠，
又，通常光圈愈大，景深愈淺。和妳說的正好相反。
閒來拍一下短片無傷大雅，但反客為主就變成本末倒置。
我不反對有附加功能，但我們不要忘記所有這些功能的開發費用，都是羊毛出自羊身上。
我要買的是一台單車，請不要在單車上硬裝上摩打，扮成摩托，然後賣貴一倍。
Post a Comment